الخبز والعصى

من طرف أبيض القلب الإثنين مارس 15, 2010 10:57 pm

اتجهت الى بقعة ظل بجوار الجدار الحجرى القديم .. بالقرب من المخبز وقفت .. أسند اليأس ظهرها الى الجدار حذاوها يئن تحت وطأة قدميها .. (انحشرت) فى طابور العيش منذ الصباح الباكر ، وعندما اقتربت من الشباك كان الخبز قد نفد ..!!
نظرت ناحية المخبز: (رغيف العيش بقى مشكلة .. هه ..؟!) .. همهمت وضجيج الشارع يلفها Sad

إيه يا حليمة ..؟! خايفة..؟ خايفة ترجعى من غير عيش .. هه .. ؟!) ..
تحركتْ يدها اليسرى تزيح خصلة الشعر على جبينها .. نظرتْ إلى يدها اليمنى تطبق على شئ .. تمتمت : (المهم الفلوس موجودة) .. وفتحت يدها: ( آدي الخمسين قرش الورق .. وآدي الريالين الفضة .. وآدي البريزة .. عال .. عال ..).
تطلعت إلى السماء : (ياااه .. الشمس بقت فى وسط السما .. أكيد إحنا قربنا من الضهر..!)
شعرت بغُصَّةٍ فى حلقها .. غُصَّة تكاد تخنقها .. ظلت واقفة تراقب الناس والمارة .. تمنت لو تتحرك .. لو تأخذ طريقها إلى البيت.. لكنها تخشى العودة .. لقد تأخرت كثيراً .. فى حين قال لها والدها : حليمة .. اشترى العيش وارجعى بسرعة و إلا..
راحت تنظر نحو السماء .. أطالت النظر .. بدأت الأصوات من حولها تتلاشى .. أصوات الناس والباعة .. مات الضجيج .. ارتسمت أمامها فى البقعة الزرقاء صورة ..
ترتدى ثياباً جميلة ، ألوانها زاهية .. شعرها مصفف بعناية ، تتهادى فى الشارع ، ذاك الشاب يبتسم لها ( بيبص لي أنا .. بيضحك لي أنا .. أنا جميلة .. بنت خالتى قالتها لي لما كنت فى بيتهم من يومين .. قالت: إنى لو لبست فستانها الجديد .. ها أبقى اجمل بنت فى المدينة ..!! .. إيه .. فيه إيه ..؟!)
كان قد دفعها صبى ، وهو يهرول فى الشارع خلف زميلة .. تناثرت النقود من يدها تحت اقدام المارة .. تناثرت فى الزحام الممتد امامها بلا قرار .. (إيه يا حليمة .. الفلوس ضاعت ..؟! .. فلوس العيش .. أبويا ومراته..!!)
وبدأت تبحث أسفل الأقدام ..(آدى الخمسين قرش أهي .. أوف .. رجلك يا أخى .. وآدى ريال فضة .. وآدى العشرة صاغ .. باقى ريال كمان .. فين هوه .. راح فين الريال.؟!)
واستمرت تبحث بدأب بين أقدام الزحام .. طالت مدة البحث .. لم تعثر على الريال المفقود .. يئست .. شعرت بأحشائها تتمزق .. فانكمشت كقطة فشلت فى اصطياد فأر وتمتمت: ( آه .. العقاب .. العقاب بقى مضاعف ..!!) .. وقفت وأمارات الحيرة تبدو على وجهها الخمرى الجميل .. خُيِّلَ لها انها عادت إلى البيت :
- فين العيش يا بنت ..؟!
ارتبكت .. تلعثمت ..
- الطا .. بور .. الطا .. بور ... العيش .. مفيش . خلص .
- وليه التأخير يا بنت الدايخة ؟!
أمسك بعصاه الممددة بجواره وأكمل : وفين الفلوس ..؟
الف..لوس.. ال.. فلوس أهى .. بس فيه .. فيه ريال ضاع مني.
فصرخ:
- الله .. الله يبقى لا عيش ولا فلوس وكمان تتأخرى الساعات الطويلة دى ..؟! .. تعالى هنا .. يابنت الكلب .
الدموع تنهمر من عينيها :
- يا ابويا .. أنا وقفت فى الطابور بدرى .. لكن .. لكن العيش .. العيش خلص .. قبل ما أوصل الشباك..!!
- عفواً يا آنسة..!!
اقتحمت أذنها تلك الكلمات .. نظرت فرأت شاباً وسيماً يمر بجوارها ، كان قد اصطدم بكتفها فاعتذر .. ( ال ااه .. الله كلام رقيق .. يا ااه .. كلام كله حنان ..!!) .. قالت ذلك فيما كان الشاب لا يزال يرمقها بنظراته كأنما يرثى لحالها .. تمنت فى تلك اللحظات لو توجه له التحية .. لكنها لم تستطع العثور على الكلمات المناسبة ..!!
تعود وتحدث نفسها : (آه .. لو أقدر أهرب من عقاب أبويا وتأنيب مراته .. آه لو أقدر أحرق العصاية الملعونة دى .. أو حتى أسرقها .. لكن لا .. لا .. دا هى عكازه ..!!).
تشعر وكأن دبيب النمل يسرى فى ساقيها..(كل يوم على دا الحال يا حليمة .. العيش وطابور العيش..!) قالت ذلك وهي تتراجع الى بقعة الظل ثانية. وقفت وراحت تتفحص ملابسها التى ترتديها ..(إيه يا حليمة .. هدومك مالها عملت كده..؟! .. يا ااه .. إنتِ لابساها من إمتى..؟ .. هى كان لونها إيه..؟!).. تعود صورة ذلك الشاب الذى اصطدم بكتفها .. تعود صورته إلى رأسها ، تعاود النظر الى النقود فى يدها .. وهى تقول: (آه لو يرجع تانى ..)
وراحت تتحسس كتفها بيدها ، صدرت من داخلها تنهيده طويلة ، بعدها عادت صورة والدها المكفهرة المزمجرة .. عادت لتقتحم رأسها .. نظرت ناحية الشمس وهى تقول Sad

إحنا بقينا بعد الضهر .. زادت العقوبة أكيد يا حليمة..!!)
وجهها الخمري يشع خوفاً ، عيناها الزرقاوان قلقتان .. تنظر الى الناس والسيارات التى تمر عبر الشارع تحمل أبدان البشر الناعمة وهى تنسل الى جوارها.. (إيه اللى ها يكون ياترى لو الناس دى كلها جمعت المبالغ اللى بيصرفوها .. أو نصها .. أو حتى ربعها .. ووهبوها لي .. هه ..؟!) قالت ذلك وهى تبتسم وأضافت : أكيد أبويا ها يغَّير معاملته معايا وساعتها يمكن يقول لي : يا ابنتى الحلوة جاء (فلان) وطلب يدك .. وتقاطعه:
- لا .. لا مابفكرش فى الجواز دلوقت ..!!
- لكنه يابنيتى .. رجل متعلم .. ومركزه محترم.
- وليكن .. وليكن .. أنا مش ها تجوز إلا من .. إلا من (دكتوور)..!!
علت ثغرها الجميل ابتسامة وردية شفافه .. لكنها سرعان ما بدأت تتلاشى حتى اختفت تماماً .. (العيش .. الفلوس .. الوقت .. التاخير .. أبويا .. ومراته ..!!) تصارعت الصور فى رأسها .. تداخلت .. أختلطت .. تباعدت .. اقتربت .. انقلبت .. واعتدلت .. وراحت تدق رأسها دقاً .. ومضت بخطوات كليلة وهى تحدث نفسها : أرجع البيت ؟! أوف العصا ..!!

من طرف **vipman089** الأربعاء مارس 17, 2010 8:51 pm

مشكورررررررررر اخي أبيض القلب قصة واقعية وانا سمعتا من اكتر من مصدر
يسلم دياتك علطرح الحلو
تقبل تحياتـــــــــــــــــــــــــــــــــــــــــــــــــــــــــي